O experto Secretaria de Afiprodel Un gran nicho de emprego por conta allea na costa galega

Segundo datos de afiliación e altas de outubro de 2011, Camariñas presenta 259 altas no sector industria, fundamentalmente empregos xerados nas factorías de transformación e preparación de produtos do mar.

Camariñas -datos do Ardan 2010- conta con cinco conserveiras, envasadoras ou preparadoras de peixe e marisco que empregan 126 persoas de forma permanente, o que supón máis do 49% dos postos de traballo do sector industrial do concello. A este dato habería que sumar o número de contratos temporais que estas actividades xeran nas tempadas de máis produción, polo que podemos afirmar que máis do 50 % dos empregos do sector industrial estarían vinculados a esta actividade.

A man de obra é fundamentalmente feminina nas cadeas de procesado e envasado, aínda que tamén ten empregados, a maioría masculinos, nos mandos intermedios e nos servizos de transporte e empaquetados.

No estudo cualitativo realizado pola Area de Igualdade do Concello analizábanse o traballo feminino das empresas conserveiras de Camariñas.

Contratacións

A maior parte das contratacións son fixo discontinúo e temporais na cadea de envasado. Tamén é destacable a satisfacción das mulleres empregadas polas condicións económicas, as melloras no traballo, grazas ás actuacións de modernización e innovación das empresas, e as prestacións e garantías que que supoñen as súas cotizacións na Seguridade Social. Polo que se refire ás limitacións e debilidades, o máis chamativo é a escasa posibilidade de ascenso na empresa, limitada posibilidade de formación, a monotonía e dureza do traballo en cadea e a necesidade de revisión da política salarial.

Estas características son comúns, neste subsector, en todo o territorio galego.

Sen embargo, son poucas as empresas que contan con plans de igualdade, que contemplen entre outras materias, acceso ao emprego, clasificación profesional, promoción, formación, retribucións e ordenación dos tempos de traballo, así como medidas que favorezan a conciliación laboral, persoal e familiar do persoal traballador. Estes aspectos repercutirían beneficiosamente no emprego deste subsector que é, hoxe en día, o maior nicho de emprego por conta allea en moitos dos territorios costeiros de Galicia.