Cinco establecementos hostaleiros da volta participaron no concurso de pinchos incluído na Semana Cultural
03 ago 2011 . Actualizado a las 06:00 h.O xurado do concurso de pinchos de Zas -integrado polo concelleiro de Cultura, Antonio Souto; os cociñeiros Marcos Fernández López e Pablo Paz Rey, e o representante da Asociación de Empresarios Comarca de Soneira José Antonio Pato Louzao- non o tivo fácil para escoller entre as numerosas propostas presentadas polos establecementos Palacio de Cristal, A Lareira, Mar de Ardora, Casa Rogelio e restaurante-cafetería do centro sociocultural. Pero ao final houbo fumata branca. Na categoría de pincho tradicional, o primeiro posto foi para a croqueta de queixo de Arzúa e marmelo que presentou Palacio de Cristal, e o segundo, para a torta de fariña e touciño de Casa Rogelio.
En canto aos pinchos innovadores, as cinco propostas de Mar de Ardora -arroz con grelos e carabineiros, sopa fría de chícharos, xamón con menta e tosta de molete, ensalada de cogombro, patacas, menta e iogur grego, e lasca de bacallao con garavanzos ao curri- recibiron un primeiro premio conxunto, mentres que o segundo foi para o cachelo con grelo e rape que elaborou A Lareira.