reportaxe O CCA premia a creatividade nos debuxos para os pais

O Centro Comercial Aberto (CCA) de Carballo fixo onte entrega dos premios aos nenos que participaron no concurso de debuxo organizado con motivo da celebración do Día do Pai. Foron tantos os traballos que se presentaron, case 1.400 (concretamente, 1.369), que o xurado se viu na necesidade de ampliar o abano de galardóns. Estaba previsto que, por cada categoría, se ofrecese un premio de 90 euros. Pero, ademais deses, concedéronse nove accésits de vinte euros.

Maricarmen Freire, xerente do CCA, sinalou en Radio Voz a calidade dos debuxos presentados polos nenos e, por tanto, as dificultades que tivo o xurado para elixir. Pero, finalmente, os gañadores foron catorce.

Yanira F. Gerpe Arrieta, da galescola As Landras, foi a gañadora do primeiro ciclo da categoría infantil. Nesa mesma modalidade, o accésit recaeu en Paula Río Río, da escola infantil Xílgaros. Tamén dentro da categoría infantil, pero no segundo ciclo, saíu vencedora Noelia Freire Castro, do CEIP Nétoma-Razo. Os accésits foron para Marta Otero Mato (do Artai), Sofía Periscal Suárez (da escola infantil A Ledicia) e Dalia Piñeiro (Artai).

No primeiro ciclo de educación primaria, o galardón de 90 euros foi para un neno, Kevin Teijeiro Santos, do colexio A Cristina. O accésit correspondeulle a Irene Pensado Busto, do Fogar. No segundo ciclo de educación primaria gañou Sarah Méndez Outeiro, do CEIP Bergantiños e os 20 euros levounos Manuel Verdes Collazo, tamén dese mesmo centro educativo.

Finalmente, o terceiro ciclo de educación primaria tivo como gañadora a Iris Denapoli Lamas (do Bergantiños). Os accésits foron para Sofía Vila Carracedo (do Fogar) e Jorge Fariña Rodríguez (do Nétoma Razo).

Todos eses cartos poderanse consumir en calquera dos establecementos do CCA, para mercarlle algo a cadanseu pai.

Hoxe, taller en Laxe

Para a tarde de hoxe, por outra banda, o Concello de Laxe tamén preparou algo. Trátase dun obradoiro infantil con motivo do Día do Pai. Será a partir das 17.30 horas na Aula de Informática Municipal. Os nenos só han de levar un debuxo das dúas mans do pai e, tamén, moita creatividade e ganas de pasalo ben.