TRIBUNA ABERTA Facer da necesidade virtude

Xa me estrañaba a min que detrás de toda aquela polémica xurdida a respecto da posibilidade de que o ISM acabase trasladando as súas oficinas a outra localidade non estivese a sombra alargada do excelentísimo señor alcalde e o seu eficacísimo equipo de goberno.

Sen ánimo de ser mal pensados, o certo é que sempre tiven a sospeita de que, no canto de nos brindaren aos cidadáns a oportuna información que nestes casos cómpre, o que recibiamos os fisterráns de a pé por parte da autoridade municipal era a calada por resposta. Toda unha declaración de intencións da política de sumidoiros que abandeiran os nosos actuais gobernantes.

Porén, non é que agora eu queira subirme ao carro do oportunismo a teor da irrefutable evidencia que desprenden as declaracións realizadas polo delegado do Goberno en Galicia, Antón Louro. Calquera atento observador da realidade social, cultural e política do noso concello poderá constatar, sen demasiados esforzos, a pertinencia da nosa análise. De entrada, porque se trata dunha táctica habitual, absolutamente execrable, de facer política rastrera e de tirar balóns fóra co único propósito de cargarlles o morto aos demais.

A actitude do alcalde de Fisterra ao longo de todo este proceso caracterizouse por unha ambigüidade absoluta e unha inoperancia máis que alarmante. Dá a impresión de que para o rexedor unha das súas máximas radica na consciencia de facer da necesidade virtude, algo que como todos sabemos supón, amais dunha grave irresponsabilidade impropia do cargo que ostenta, o risco de sumir á veciñanza nun caos absoluto de ilimitadas consecuencias.

É obvio que o alcalde Traba ten adquirido un compromiso coa sociedade fisterrá desde o momento en que os cidadáns decidiron outorgarlle a súa confianza nos comicios electorais de 2007. E isto xa debera ser motivo suficiente para persuadilo da tentación de mentirlle ao electorado con argucias e falacias como as do traslado das oficinas do ISM.

Non todo vale en política, máxime cando do que se trata é de mellorar as condicións de vida dos habitantes da localidade, únicos e lexítimos depositarios da vontade popular.

Se o que pretende é unha ampliación do actual centro de saúde trasladando os servizos do ISM a outro concello limítrofe que o diga con claridade e, a poder ser, sen crear enfrontamentos con outras administracións públicas.

O tirón de orellas do delegado do Goberno supón, amais dun duro revés á política do enfrontamento alentada pola pléiade do goberno municipal, un descrédito que os fisterráns non nos merecemos. Porén, sería bo que Traba rectificase e pedise desculpas publicamente. Só así poderemos coñecer a verdade, sen enganos nin terxiversacións interesadas.