Os coordinadores dos bancos de tempo de Barcelona, Vigo e Carballo expuxeron as vantaxes das iniciativas
11 mar 2010 . Actualizado a las 02:00 h.Josefa García Rubio nunca entendeu que utilidade podía ter un banco de tempo. Ata que quedou viúva. Foi entonces cando esta catalá que onte estivo no Pazo da Cultura de Carballo decidiu unirse ao proxecto do Bon Pastor, en Barcelona, e ofrecer os seus coñecementos de costura de forma gratuíta. Nunca pensou en pedir nada a cambio, pero un día necesitou que alguén lle puxese un enchufe. Un dos seus compañeiros do banco fíxollo sen cobrar nada a cambio. Este é só un dos exemplos que onte se expuxeron no auditorio do Pazo para dar a coñecer a utilidade deste sistema, un proxecto que multiplica as posibilidades de dar e recibir. Todo de balde.
«La moneda de cambio es la hora», explicou Rosa María Ruíz, secretaria do banco de tempo barcelonés e firme defensora das vantaxes do sistema. «Facilita las relaciones intergeneracionales, ayuda a conciliar la vida familiar y laboral, favorece la igualdad entre hombres y mujeres, es un fantástico instrumento de ayuda mutua», resumiu.
Con ela coincidiu Obdulia Souto, a coordinadora do banco de tempo de Vigo, onde hai máis de 200 socios, a maioría deles mulleres, unha circunstancia que tamén se da no de Carballo, onde dos 45 usuarios que hai na actualidade, só sete son homes.
En Vigo, indicou Souto Costas os integrantes do banco poden optar a máis de 200 actividades, dende excursións ou visitas guiadas a talleres de manualidades ou arranxos mecánicos. A única condición é que cada un dea aos demais o que sabe ou ten. Puxo como exemplo a unha socia de 89 anos, que a cambio das súas peticións escribe un artigo de opinión mensual «e dedícase a dar empatía, a acompañar aos que están sos».
No caso de Carballo, o banco de tempo, que naceu a finais do 2008, aínda está dando os primeiros pasos. Pero moi firmes, segundo contou a súa coordinadora, María José Pombo Vilariño. Na capital de Bergantiños xa se fixeron cursos de manualidades, maquillaxe ou calceta, pero tamén houbo intercambios individuais, como traslados en coche ou axuda nas tarefas domésticas. E en todos os casos, os usuarios coinciden, a mellor forma de non perder o tempo é compartilo. Incluso aumenta a autoestima.