O goberno local de Corcubión destinará preto de 150.000 euros á obra do centro de día

Este semana está previsto que comecen en Corcubión as obras de recuperación dos dous edificios da rúa Antonio Porrúa que albergarán o centro de día municipal.

A actuación é tan só unha primeira fase dun proxecto que non poderá ser rematado cun único investimento. Explica o alcalde, Francisco Javier Lema, que os fondos que se empregarán ascenden a preto de 55.000 euros para as primeiras actuacións, diñeiro que se usará, sobre todo, en arranxar as cubertas dos dous edificios.

Nos próximos meses volverase a actuar de novo nos inmobles, xa que, explica o rexedor, o Concello decidiu destinar a esa obra unha parte substancial do próximo Plan E.

O plan estatal destinará a Corcubión unha suma próxima aos 190.000 euros. O alcalde explica que aínda non especificaron a cantidade que se empregará no centro de día, pero podería roldar os 100.000 euros.

Con todo, a cifra é insuficiente para rematar a obra. Os dous inmobles están moi deteriorados tras anos de abandono e necesitan un gran investimento para poder ofrecer un servizo. En total, explica o alcalde, farían falta 380.000 euros para completar a obra.

Co plan estatal para o emprego mellorarase a estrutura e probablemente instálese un ascensor, pero fará falta conseguir máis axudas para rematar a obra.

Por outra banda, esta tarde está previsto que se aproben as obras do POS no pleno ordinario que se celebrará na localidade. O Concello conta con preto de 70.000 euros provenientes da Deputación, dos que preto de 40.000 euros irán para reparar a cuberta da capela do Pilar , dedicándose o resto a gasto corrente.