Eran moitos os que visitaban a Manfred Gnädinger, Man, «o alemán de Camelle», no seu museo. Chegou a ser, para algúns, un dos puntos de referencia na Costa da Morte. Dende o seu falecemento o 28 de decembro do 2002, tamén son moitos os que o seguen recordando.
Internet está ateigado de referencias á súa figura e á súa obra, pero das páxinas con dominio exclusivo non pode dicirse o mesmo. A deixadez de certos organismos de cara o legado que deixou este persoeiro intenta ser combatida, non obstante, con iniciativas particulares. Unha delas, a do empresario laxense José Manuel Pato, que puxo en marcha, hai uns cantos meses a páxina web www.museoman.com. Defínea como «unha homenaxe a Man, unha iniciativa sen ánimo de lucro ningún e a cal pretendo poñer a disposición do Concello».