Entrevista | fernando fraga traba director da escola de música de Cee «O Conservatorio daría unha saída aos rapaces»

O director da Escola de Música de Cee, Fernando Fraga Traba, presentou a semana pasada o libro A man lixeira... Pezas para acordeón , un manual de carácter pedagóxico destinado ás persoas que dan os seus primeiros pasos na interpretación do acordeón. Recolle 45 melodías e inclúe un cedé con todas esas pezas musicadas. É froito de sete anos de intenso traballo de recompilación.

-¿Que ofrece o libro?

-Contén, sobre todo, partituras de música tradicional galega. O que fixen foi arranxalas para que a xente que toca o acordeón teña un libro con pezas específicas. Ata agora só existía unha transmisión oral ou por medio de manuscritos, pero non había nada impreso.

-Inclúe tamén a versión musical desas pezas.

-As 45 pezas están gravadas nun cedé para que os estudantes teñan unha referencia auditiva de como creo que deben de soar esas pezas. É unha referencia soamente, porque a música galega, como toda a música, ten múltiples versións e formas de interpretación.

-¿Hai interesados en aprender a tocar o acordeón?

-A verdade é que si. Agora mesmo temos na escola sobre 20 alumnos. Son rapaces desde seis anos ata xente que xa está xubilada e que sempre tivo ganas de aprender, pero non tiña tempo. Teño alumnos de case os 70 anos. ?-Cunha clase de idades tan variadas ten que ser tremendo o intercambio de experiencias.

-É moi gratificante que estea tocando un rapaz de seis ou sete anos e que entre unha persoa maior e quede abraiada por como toca. E tamén ocorre ao revés. Ao final dáse un xogo moi bonito entre dúas ou tres xeracións.

-O título do libro fai referencia á man lixeira. ¿É necesaria para tocar o acordeón?

-Ten un dobre significado. Por un lado é o que debe ter un instrumentista, pero esa expresión tamén está sacada da letra dun alalá galego onde di que «o amor que ha de ser meu debe ter a man lixeira, á de coller a rosiña sen abalar a roseira».

-¿Que peza destacaría de todas as recollidas no libro?

-É difícil elixir porque hai alalás, cantos de berce, de arrieiro, danzas de todo tipo... Hai unha peza que a min me parece moi significativa porque foi recollida na zona de Cee. Era dun acordeonista que tocaba nas festas nos anos sesenta. A transcribín porque o meu pai a cantaba, porque non había ningunha partitura e o acordeonista xa non vivía.

-¿Segue sendo a Escola de Música de Cee unha das máis baratas de toda España?

-Así é e todos os profesores que veñen a impartir clase a Cee sempre nos comentan que é un dos sitios máis baratos dos que traballaron.

-¿Sería viable ter un Conservatorio en Cee?

-A nivel académico o Conservatorio sería moi necesario, porque lle daría unha saída a todos os rapaces que queren continuar os seus estudos de música. A súa viabilidade xa é algo máis político e económico.