A carpa do xardín municipal de Carballo converteuse durante a mañá de onte nunha «fábrica» de contos. Os traballadores foron nenos de todas as idades, que durante dúas horas participaron nas actividades «veloces para facer e levar» deseñadas para introducilos no mundo da literatura dun xeito lúdico e creativo.
As vacacións axudan á participación dos rapaces, moito máis dispostos a recorrer a Praza dos Libros que os maiores. Despois da animación do xoves pola mañá, o ambiente relaxouse pola tarde e tamén durante a xornada de onte, agás durante a celebración das actividades paralelas programadas polo Concello de Carballo.
A presenza dunha caseta de Solidariedade Galega do Pobo Saharauí, que ten unha delegación na Costa da Morte moi interesada en revitalizar a organización na zona, conseguiu atraer o xoves pola tarde a moitas persoas interesadas en coñecer o traballo que desenvolve. O subdelegado saharauí para Galicia, Mahmoud Elhda, deu todas as explicacións. Máis público houbo aínda nas presentacións dos libros de Xosé Ramón Freixeiro Mato e Paco Souto, dous autores da comarca con obras nada semellantes, xa que o primeiro falou sobre Lingua, nación e identidade , unha compilación de artigos sobre diversos aspectos da lingua, e o segundo fixo un recital con poemas do seu libro As horas de María .
A animación regresou onte pola tarde con Viravolta, que encheu o xardín de zancudos, malabaristas e títeres para protagonizar, xunto cos nenos, Unha de piratas , cun tesouro como recompensa. Os autores locais Xurxo Borrazás e Xan Fraga coincidiron ás nove, noutro momento de gran afluencia, para presentar as súas últimas obras, e un concerto da caboverdiana Nancy Vieira pechou o programa da xornada.