dni barbanceses no seu recuncho «No eido artístico, tiras para diante porque che gusta, pero é complicado»

Baixo a marca Arteleira, desde hai un tempo está a percorrer Barbanza unha colección de esculturas que son obra dun artista ribeirense. Trátase de Jontxu Argibay, coñecido tamén por ser o autor de pezas que son como emblemas en lugares estratéxicos da comarca, como é o caso do Polbeiro de Castiñeiras ou do Segador de Olveira. Pese a dedicarse ao complicado eido da creación, el elixiu a súa terra natal para desenvolver a súa profesión e a súa vocación. Recoñece que non lle está a resultar nada doado e que incluso se veu obrigado a diversificar o traballo cara a rama formativa para seguir a flote, pero confía na chegada de tempos mellores. Mentres, expresa pensamentos e sentimentos como mellor sabe, dándolle forma a materiais inertes.

Para inspirarse, Argibay acode con frecuencia, sobre todo no inverno, aproveitando a ausencia de bañistas, á praia do Castro, en concreto, ás ruínas que quedan en pé da vella fábrica de conservas. Asegura que este é o seu recuncho preferido: «Alí xogaba cando era pequeno e parecíame un lugar moi divertido. Había varias edificacións e era coma un labirinto, agora vou a debuxar e a pensar».

A paraxe sérvelle ao creador para viaxar no tempo e retrotraerse ata épocas pasadas: «Aproveitando as historias que me contaba o meu avó, que era mariñeiro, imaxínome como se vivía nesta zona alá polos anos corenta». Jontxu recoñece que das súas estadías no areal do Castro «saíron moitas esculturas», por iso, defende que a zona se acondicione e pase a ser un espazo verde para o goce de todos os veciños.

Longa traxectoria

As ideas que a este ribeirense lle veñen á cabeza na praia de Castiñeiras e noutros recunchos da parroquia, consérvaas no maxín para logo darlle forma no estudo que ten en Aguiño, un lugar que tamén forma parte da súa lista de espazos preferidos. O creador montou este taller xunto a José Gude no 2003, aínda que desde hai pouco máis dun ano, afronta a aventura en solitario. Arteleira é, ademais do seu estudo, a súa marca persoal.

Jontxu considérase unha persoa afortunada por estar cumprindo o seu sono, aínda que sexa superando un sinfín de obstáculos: «No eido artístico, tiras para diante porque che gusta, pero é complicado, custa moito vivir disto e ás veces é frustrante ver que te estás esforzando para nada». Por iso, o ribeirense tivo que diversificar o seu labor cara a rama formativa. Desde hai un tempo, ten en marcha un obradoiro de iniciación á escultura en Carreira e pretende impartir clases noutros puntos da comarca. Asegura que calquera pode subirse a este carro: «Para dedicarse profesionalmente á escultura hai que perfeccionar a técnica, pero para empregala como unha fórmula de lecer e relaxación, é algo moi doado».

Jontxu argumenta que tocar o material e darlle forma coas mans é un bo método para fuxir do estres e tamén para aprender a ser máis tranquilo e a controlarse. A el gustaríalle que a escultura lle servira tamén para estabilizarse profesionalmente, aínda que recoñece que, coa crise, os encargos das Administracións se paralizaron e a nivel particular, «só compran os verdadeiros afeccionados».

Jontxu Argibay

Escultor

A vella conserveira da praia do Castro, onde «xogaba cando era pequeno e a onde vou agora a debuxar e pensar»