de tal pau, tal acha | antonia González, óscar e david fernández A cabalo entre o sal e a pementa

A relación desta familia noiesa cos fogóns ven de moi lonxe, exactamente dende hai 109 anos. Segundo contan Óscar e David, foi o seu bisavó quen alá polo ano 1900 fundou o primeiro negocio: unha fonda na que non só se servían comidas, senón que tamén se daba aloxamento. A casa matriz, como eles lle chaman, estaba pegada ao restaurante que a día de hoxe rexentan e que recibe o nome de Ferrador.

Aquel primeiro establecemento, que a familia alternaba coa actividade de ferrar cabalos e vacas, estivo operativo ata o ano 58, momento en que se trasladou ata o número 11 da rúa Costa do Ferrador. Cabe destacar que as instalacións onde a día de hoxe está situado o negocio eran o lugar empregado polo avó de Óscar e David, coñecido como o señor Paco, para ferrar os animais.

A pesar do cambio de ubicación os donos seguiron quentando os fogóns e ofrecendo camas á súa clientela ata o ano 1967. Naquel momento, e con María Antonia recen chegada á familia - posto que había pouco que casara co fillo dos propietarios do bar-, o negocio deixou de dar aloxamento. Pero ese non sería o único cambio que sufriu o local hostaleiro antes da chegada da década dos setenta, posto que alá polo ano 68 os seus propietarios decidiron reformar por completo as instalacións e montar un café bar.

«Pasamos de ter un bar tradicional a rexentar un local para a xuventude. Ofertábamos bocadillos e tapas e tamén tíñamos máquinas de xogos», di María Antonia.

Unha década despois, e grazas aos consellos dun inspector de Turismo, o bar transformouse de novo en restaurante. «Un bo día veu por aquí uns inspector de Turismo e díxonos que o local era moi bonito e que o podíamos destinar a restaurante, pensámolo e aquí estamos», apuntou a restauradora.

Así, con María Antonia aos fogóns, quen aprendeu a cociñar grazas as tías do seu home e a unha tía súa que traballaba en Madrid atendendo a marqueses e condes, o Ferrador comezou a servir comidas máis elaboradas, nas que non faltaban os callos, a fabada ou a carne asada.

De pais a fillos

Como non podía ser doutro xeito, dous dos fillos de María Antonia sentiron a chamada da cociña dende moi novos. Sobre todo Óscar, quen dende a adolescencia xa lle pedía aos seus pais permiso para atender á clientela e servir as mesas. Esa ambición foi a que o levou a estudar cociña en Santiago e a darlle un toque de fusión á carta que hoxe os caracteriza. Das súas mans saen receitas como filloas recheas de marisco sobre salsa de ourizos ou lacón asado con castañas glaseadas, así como outros pratos máis tradicionais, como as ameixas á mariñeira ou as receitas de rape.

Os mesmos pasos seguiu o seu irmán David, aínda que neste caso especializouse na rama de restauración. Así, coas ilusións renovadas e a experiencia que lle aportaron os seus antepasados, estes dous mozos encárganse do restaurante dende o 2005.

A fama da que gozan fai que ata o seu local se acheguen persoas de toda a comarca e xente que acostuma a saír no papel cuché como Jorge Fernández, Jaime Cantizano ou o cantautor Pablo Milanés, entre outros.