Primeiro libro da Orola

A asociación cultural Ponte Vella de Abelleira xa fixo a súa primeira publicación literaria. Nela, preséntanse as obras que concorreron aos tres certames de relatos curtos A Orola, convocados ata o de agora por esta entidade. O acto de presentación do novo libro serviu tamén para facer entrega do premio acadado este ano por Rocío Leira, pola súa obra O alpendre dos meus soños .

A presidenta da asociación, Nuria Romero, dixo na súa intervención que a entidade se propuxera publicar todos os relatos presentados ao concurso, co ánimo de espallar o seu labor como entidade, e para darlle un motivo de satisfacción aos autores que teñen participado neste certame.

Tamén, o secretario do xurado do concurso deste ano, Antonio Priegue, significou que pretenden que a todos os fogares da parroquia chegue o volume publicado, e que farán o posible para que as bibliotecas e os centros escolares do municipio dispoñan deste volume, que ademais de ser unha boa mostra do bo facer literario de novos escritores, ofrécella e estes a posibilidade de que as súas composicións vexan a luz.

Afán de colaboración

A responsable da comisión de Cultura de Deputación coruñesa, e á vez presidenta do xurado do certame, Caridad González, comprometeuse a que o ente provincial colabore nos vindeiros anos na potenciación deste certame, animou aos mozos da bisbarra a afondar na produción literaria, felicitou á entidade veciñal por esta iniciativa e animouna a seguir potenciando a cultura galega.

O acto de presentación do libro serviu tamén para dar a posibilidade a un mozo muradán, Samuel Lema, de dar a coñecer unha escolma da súa ampla e variada produción poética. O autor lírico leu uns cantos poemas seus, moi apegados á comarca muradá na súa temática, ben articulados tecnicamente e reflectindo sentimentos, costumismo e maneiras de pensar dos mozos da bisbarra.

O público presente amosou a súa sintonía co mozo, festexou as súas ocorrencias líricas tan apegadas á xente e animouno cos seus aplausos a seguir producindo poemas desta natureza.

O acto de presentación do volume rematou cunha merenda que se converteu nun encontro lúdico-cultural entre creadores literarios e veciños de Abelleira.