Entrevista | Dominga Brión Sanmiguel Candidata do bloque pola Coruña «O BNG fai políticas para a xente»

Concorre por terceira vez como candidata nas listas do seu partido pola provincia de A Coruña. Nesta ocasión, a ribeirense Dominga Brión vai no posto número oito: «É toda unha honra, o respaldo a un traballo feito no que tamén están todos os compañeiros».

-¿Nota receptividade por parte da xente?

-Si porque aínda que a miopía do PP impídello ver, fíxose un traballo importante. Hai un gran labor que a xente foi vendo en todos os concellos. Na comarca hai 300 persoas que cobran a axuda da dependencia e o número vaise multiplicar en maio; apoiouse ao sector turístico e ao comercio de proximidade, e creouse chan industrial, entre outras moitas cousas. O BNG fai políticas para a xente e non importa a cor de quen goberne nese concello.

-¿Os polígonos garanten a creación de emprego?

-O primeiro que hai que ter para que unha empresa se poña en marcha é chan. Ás veces é difícil que se poida instalar unha compañía, e aí está a nosa aposta polas naves modulares con opción de compra. Se se crean as condicións ten que xerar emprego. Nós sempre apostamos polos sectores produtivos e houbo fortes investimentos en I+D+i que permiten consolidar e ampliar os postos de traballo. A Administración debe realizar as políticas necesarias en favor dos sectores produtivos para crear emprego e riqueza.

-¿A vindeira lexislatura será a do saneamento integral?

-Ten que ser unha prioridade. O caso que se dá en Ribeira ten que resolverse, non pode ser que unha ría como a de Arousa, ou calquera outra, reciba verteduras directas. Aquí temos o mellor peixe e marisco do mundo.

-¿Cal sería a primeira actuación que proporía para a comarca se gobernan?

-Concluír o empezado: rematar os polígonos, acadar o saneamento integral e ampliar os servizos sociais. Esas serían prioritarias, pero hai máis cousas: ampliar as especialidades do hospital ou establecer os ciclos formativos de acuicultura, hostalería e turismo. Ademais, agardo que Ribeira non perda a oportunidade de ter vivenda protexida, sempre co consenso dos propietarios dos terreos e do Concello.

-¿Que balance fai destes catro anos?

-Positivo. Os servizos sociais na comarca deixaban moito que desexar pola falta de centros, en Ribeira levábamos 20 anos sen poñer en marcha nin un só metro de chan industrial. O PP non fixo gran cousa en 16 anos de goberno e non actuou no fundamental: crear emprego e apoiar aos sectores produtivos. En tres anos e medio non se pode cambiar todo un réxime, pero o BNG fixo un labor moi importante, como poñer en marcha o sistema galego de benestar. Despois de Cataluña e Andalucía, Galicia é a comunidade onde a lei de dependencia está máis desenvolvida.

-Atrévase cunha quiniela.

-O BNG vai subir e vai gobernar.