«A denominación de orixe e calidade servirá para dar un impulso definitivo ao sector»

BARBANZA

05 dic 2008 . Actualizado a las 02:00 h.

Falar da construción de buques en madeira é facelo dunha actividade vinculada á cultura e ao patrimonio marítimo, que require do protagonismo propio dun gremio que ten no noroeste peninsular o seu último reduto produtivo. De aí que xurdira a Asociación Galega de Carpintería de Ribeira, cuxa sede radica en Boiro, e o seu presidente é o empresario Gerardo Triñanes Fernández (Boiro, 1961).

-En febreiro anunciou a creación dun novo regulamento para este sector artesanal. ¿Como se atopa na actualidade este tema?

-Estamos na primeira fase, que consiste na recollida de datos sobre esta actividade, así como a recompilación de información de como está a normativa comunitaria no que a manipulado de madeira se refire. A idea é presentar o informe ao longo deste mes.

-Di vostede que a nova normativa estará redactada dentro de dous anos, ¿é moito ou pouco tempo?

-Facer un novo regulamento é unha tarefa que leva moito tempo conseguir, xa que todos os pasos deben consensuarse coa Dirección Xeral da Marina Mercante, debido a que as competencias na construción naval as ten o Goberno Central e non a Xunta. O papel da sociedade de clasificación de buques Bureau Veritas é o de verificar que todo segue o curso establecido.

-Entón, ¿que papel xoga a Consellería de Industria en todo este proceso?

-Grazas ao compromiso mostrado pola directora xeral de Innovación, Elena Veiguela, a elaboración deste informe oficial non lle custará un só euro a Agalcari, xa que será a Xunta a que sufragará todos os gastos que se derivan destas actuacións.

-¿E para cando ese selo de calidade que tanto reclaman os profesionais?

-Iso levará moito tempo, aínda que non lle podo adiantar datas concretas porque non existe ningún precedente dentro do ámbito da artesanía.

-¿Que supón ter este distintivo?

-A denominación de orixe e calidade servirá para dar un impulso definitivo ao sector, ofrecendo un produto que leva consigo un maior valor engadido, xa que na práctica o que se ofrece é unha embarcación única e diferenciada do resto, porque non se esqueza de que non hai dous barcos iguais porque case todo se fai a man.

-Ademais traballan con materias primas que respectan o medio ambiente.

-É unha das claves do noso traballo. O consumo enerxético é moi baixo e os materiais empregados non son agresivos coa natureza.