Tres días de acampada libre coa posibilidade de asistir a unha clase de astronomía

Como en edicións anteriores, as actuacións musicais serán o prato forte do Galle-rock, pero Bastantes Llon quixo completar o festival con outras actividades. A primeira nova con respecto a anos pasados é que as persoas que o desexen terán a posibilidade de acampar libremente no parque periurbano de San Roque ao longo das tres xornadas de concertos. Ademais, para o día 14 hai previstas unha conferencia e unha clase de astronomía.

Daniel Bravo será o encargado de abrir o programa de actividades do Galle-rock. Farao ofrecendo unha charla sobre a historia de Ribeira. Ese mesmo día pola noite, os membros da asociación Cielo Barbanza impartirán unha lección de astronomía. Axudados por telescopios, axudarán ás persoas que o desexen a identificar estrelas, constelacións e planetas.

A maiores, ao longo do festival, a asociación Bastantes Llon ten previsto organizar un campionato de mus e algunha iniciativa de carácter gastronómico, como unha sardiñada. O que está claro é que comida non lles faltará ás persoas que se dean cita en San Roque, xa que se poñerán á venda diversos produtos como bocadillos e racións de churrasco.

Co fin de poder sufragar o custe destas e doutras actividades que se irán incluíndo no programa do Galle-rock, o colectivo organizador está a levar a cabo diversas accións, entre as que destacan o sorteo dun premio en metálico e dunha guitarra, a confección dun libro con publicidade e a venta de artigos como chisqueiros.