A derradeira xornada da Liga de Preferente Sur podería deparar este domingo o sorprendente descenso do Juventud Cambados ou do Ribadumia, pese aos 48 puntos cos que xa contan ambos nos seus respectivos casilleiros. E é que á espera do que fagan os catro representantes galegos na fase de ascenso á Segunda B, a semana concluirá con media ducia de equipos pontevedreses e ourensáns enfiando o camiño da Primeira Autonómica ante a chegada desde a Terceira División do Verín, do Céltiga, do Lalín e do Pontevedra B.
O hipotético descenso do Cambados ou do Ribadumia pasaría inexorablemente pola vitoria do Marín no feudo do depauperado Arenteiro. Deste xeito, o conxunto marinense pecharía o campionato con 48 puntos, os mesmos que agora teñen os dous equipos do Salnés e o Gran Peña.
Os perigos para os de Carregal
Nun cuádruple empate o Cambados perdería a categoría, ao sumar tan só 5 puntos nos duelos cruzados, polos 9 de Ribadumia e Marín e os 10 do Gran Peña. O outro caso no que os homes de Eduardo Carregal descenderían sería de rematar igualados co Gran Peña e co Marín, ao contar cun triunfo e tres derrotas nos seus partidos comúns, fronte aos dous partidos gañados polo Marín e os tres do cadro vigués.
Salvaríase da queima o Cambados nun triple empate co Marín e co Ribadumia, sendo este o que acabaría neste caso na Primeira Autonómica. E iso, por un gol de diferenza, igualados os equipos do Salnés a 5 puntos -polos 6 do Marín- e 7 tantos a favor, pero co Cambados encaixando un menos, 6. Sería este o único final que remataría cun inxusto desenlace da notable tempada do plantel dirixido por Carducho.
O outro posible triple empate con protagonista do Salnés, entre Ribadumia (7 puntos nos enfrontamentos cruzados), Gran Peña (4) e Marín (6), tería o conxunto olívico como gran damnificado.
Nos dobres empates co Marín, Cambados e Ribadumia sairían ben parados, pola diferenza de goles. O inquilino da Senra, botando man do balance total da Liga, ao terse marcado entre si Marín e Ribadumia tres tantos.
En todo caso, Cambados e Ribadumia teñen a permanencia nas súas propias mans, xa que tan só precisan puntuar na derradeira xornada. O primeiro, no campo do Sanxenxo, e o segundo, na casa ante o pechacancelas.