Os traballadores de Industrias Carballo inician unha folga polos salarios pendentes de cobro

Os traballadores de Industrias Carballo , a empresa de fabricación e venda de cociñas de Vilanoviña (Meis) levan meses negociando coa empresa as saídas máis favorables para ambas as partes ante a situación que vive a firma pola crise económica, cun expediente de regulación de emprego aberto que, supostamente, debería resolverse nos próximos meses.

Por mor desa situación, aos traballadores débenselles as dúas pagas extras do ano pasado, así como a nómina do mes de xaneiro. Segundo recoñeceu onte Juan Fajardo, de CC.OO., hai xa uns meses que houbo unha ameaza de folga que logo se resolveu porque a empresa comprometeuse a ir abonando os salarios pendentes, de tal xeito que antes do mes de marzo saldaríase a débeda.

Pero chegou o mes de xaneiro, e nin cobraron a nómina pertinente nin os atrasos prometidos, polo que os traballadores decidiron acudir á folga, porque algúns deles atópanse xa nunha situación insostible e non se fían máis das promesas da patronal. Segundo Fajardo, a dirección asegura que no mes de xullo estaría resolto o problema, pero os incumprimentos anteriores fan dubidar ao persoal.

Concentración

A folga empezará hoxe e manterase durante os próximos tres días, segundo informou onte Comisións Obreiras. Ao mediodía haberá unha concentración do persoal ante as instalacións da firma en Vilanoviña.

A mobilización de Industrias Carballo non ten nada que ver coa emprendida hai xa tempo polo persoal de Mobles Carballo , provocada tamén pola crise.