Os traballadores de Granitos Triturados estudan que facer tras a negativa dos comuneiros

A comunidade de montes de San Lorenzo de Meis decidiu o pasado domingo negar á empresa Granitos Triturados os terreos para trasladar as súas instalacións, afectadas polas obras do nó de Curro . Agora, o persoal da firma convocou unha reunión para tratar de buscar unha alternativa ao problema. O empresario xa lles avisou de que, de non lograr os terreos, a empresa veríase abocada ao peche definitivo.

Esta é a segunda vez que a comunidade de montes rexeita a proposta desta canteira. Hai só uns meses, os traballadores recorreron tamén a esta entidade. O problema é que os terreos nos que se sitúa a firma van ser expropiados para poder construír o nó de Curro . Por iso a firma chegou a un acordo coa Xunta e o Concello de Meis para poder axilizar o seu traslado. Pero en todo este proceso quedaba pendente a consecución dos terreos, que son propiedade da comunidade de montes de San Lorenzo. A primeira alternativa foi rexeitada polos comuneiros, alegando que a instalación quedaría demasiado preto das casas. Os traballadores confiaban, en cambio, que aceptasen esta segunda alternativa.

O pasado domingo, un centenar de comuneiros acudiu á reunión na que se debía decidir se se aceptaba esta nova proposta. E a resposta volveu ser non. «Vos veciños non a queren. Xa pasou ou mesmo hai quince anos, cando abriu», explicou o presidente da entidade. Nin sequera a presenza de traballadores desta firma na reunión, pois son tamén comuneiros, serviu para facelos cambiar de opinión. Tendo en conta que a alternativa a non trasladar a empresa é o peche, os traballadores decidiron convocar unha nova asemblea. Reuniranse esta tarde, a partir das 19.000 horas, para tratar de buscar unha solución a este problema canto antes.