Os premios Suso Vaamonde recuperan o título de «Grelo»

Os premios Grelo de poesía volverán chamarse Grelo. E é que tras as últimas edicións, nas que se substituíu esta nomenclatura pola de premios Suso Vaamonde, a organización optou por volver ás súas orixes.

Foron moitos os que pediron á Fundación Amigos de Galicia o rebautizo destes galardóns e finalmente consumouse. Os Grelos -que a pesar do cambio de nome respectarán o número de galas pasadas, das que xa se cumpriron unha quincena- volverán premiar o labor das novas fornadas de escritores, mentres os Vaamonde centraranse a partir de agora no campo da música. A solución baséase nas diferentes facetas que resumen a figura do cantautor galego aos que se encomendan estes premios, xa que musicalizó a diferentes poetas e a súa memoria lígase aos acordes ademais da os versos, á defensa pola terra e á cultura galega.

A partir de agora, os músicos que reciban esta distinción terán máis fácil acceder ao mundo profesionalizado porque a organización pretende axudar no lanzamento do primeiro traballo ao mercado.

Bases do concurso poético

Os interesados en participar na nova edición dos premios Grelo de poesía xa poden presentar os seus traballos. Terán ata o próximo 24 de abril para facelo, aínda que non será ata o mesmo Día dás letras galegas (17 de maio) cando o xurado faga público o seu fallo.

O obxectivo é dar a coñecer aos novos creadores galegos. O premio para o vencedor ascende a 1.000 euros e a edición de cen exemplares da obra. A única condición é que os traballos se presenten en galego -independentemente da nacionalidade do autor- e que nunca antes publique outro traballo. O tema é libre e a extensión mínima, 600 versos.

«Antítese nativa»

Manuel Lopes Rodrigues, vencedor na última edición deste premio, xa ten o seu traballo na rúa. Antítese nativa recompila diferentes poemas influídos por poetas galegos e tamén doutras terras. O seu autor congratúlase de recibir este premio pero aproveita para advertir que «a dignificación do idioma galego está a pasar un dous peores momentos dous últimos anos por mor de ataques que veñen de fóra».