Do 27 de novembro ao 18 de decembro A Coruña mostra varios proxectos levados a cabo nos orfanatos na India, Nepal e Ecuador

A Coruña acollerá a partir do 27 de novembro e ata o 18 de decembro a exposición fotográfica «Tres en raia», organizada pola Fundación María José Jove, que mostra os distintos proxectos de cooperación ao desenvolvemento de profesores e alumnos da Universidade Complutense de Madrid nos orfanatos de Bal Mandir (India), Matruchhaya (Nepal) e Sinincay (Ecuador). A mostra conta con 60 fotografías cos tres proxectos que o profesor José Luis Gutiérrez e os seus alumnos levaron a cabo en 2008 nos distintos lugares. O fin de «Tres en raia» é mostrar a realidade diaria dos nenos que nalgún momento das súas vidas poden chegar a ser adoptados.

Esta exposición coincide, ademais, co desenvolvemento da actividade formativa Postadopción: adaptación psicosocial e familiar dos nenos adoptados, permitindo mostrar de forma gráfica a vida dos nenos nos orfanatos antes da adopción.

Sobre os autores

As pezas están realizadas polos membros do grupo de investigación Arte ao Servizo da Sociedade, integrado por alumnos da Facultade de Belas Artes de Complutense, encabezados por Luis Gutiérrez Muñoz, profesor titular e director do Departamento de Escultura da institución educativa. Gutiérrez Muñoz, principal autor das obras, ofrecerá o venres 27, coincidindo coa inauguración, unha charla sobre a exposición e sobre a súa propia experiencia como pai que adoptou.

Máis información

«Tres en raia» é unha exposición situada na Planta Baixa da sede Fundación María José Jove (Galileo Galilei, 4 A Edif. Work Center, A Coruña) que permanecerá aberta ao público desde o 27 de novembro ata o 18 de decembro de 2009.

Horario: Luns a venres, de 9.30h a 14h e de 16.30h a 20h.

Visitas en grupo: Chamar ao 981 160 265.

Entrada libre e gratuíta