compostela| do 29 de maio ao 14 de xuño Roteiros de Creación, unha cita ca arte en Santiago

O Roteiro de Creación, a cita anual que permite aos cidadáns transitar polos talleres de artistas, espazos expositivos e demais lugares de difusión das artes en Santiago de Compostela, celebrará a súa terceira edición do 29 de maio ao 14 de xuño.

Ademáis das visitas libres aos talleres, eixo vertebrador do Roteiro de Creación, esta nova edición irá acompañada dunha intensa programación que inclúe interesantes actividades para todos os públicos.

Os cursos e obradoiros precisan unha inscrición previa dirixidos a públicos diversos e para todas as idades: para adultos, familias, mocidade e, en especial, para os máis pequenos.

Este evento singular e de referencia, que establece un diálogo fecundo entre a cidade, as artes, os seus produtores e a cidadanía, a través das súas Xornadas de Portas Abertas e coa participación de máis de 50 creadores, ten unha nova cita co público de Santiago de Compostela, turistas e demais visitantes, para celebrar a súa 3ª edición.

O proxecto promove este evento artístico máis alá da participación de axentes tradicionais de validación e adquisición de prestixio no sistema artístico, favorecendo o diálogo con produtores de diferentes técnicas, xeracións e estéticas, consagrados e emerxentes, xa que esta pluralidade é un dos seus atractivos.

Roteiro de Creación conta cun equipo de traballo que concibe, planifica e coordina tódalas actividades estimulando a participación na creación e produción cultural, xa que conformar novos públicos e novos creadores revitaliza o feito artístico.

Nesta 3ª edición, como novidade, amplíase a participación do público con dúas propostas ben diferenciadas: a posibilidade de inscribirse para participar en numerosos e interesantes Cursos e obradoiros para nen@s e adultos o que aporta unha nova dimensión pedagóxica ao proxecto, e ademais, a de asistir ao Roteiro en Estado Crítico, unhas xornadas nas que artistas, deseñadores e outras persoas implicadas na produción e difusión da cultura, reuniranse para reflexionar e debater sobre as posibilidades do traballo creativo na sociedade actual en tempos de crise. Para isto contarase con representantes do ámbito creativo, de investigación e crítica, da educación, e de xestión cultural.

Unha vez máis e logo do éxito obtido na pasada edición, reeditarase a Operación Frechazo, convite para que o público poida valorar con corazóns nunhas «amorosas postais, a obra dos artistas visitados e cuxo premio consiste na xestión dunha exposición individual no Roteiro de Creación 2010 ao artista que máis corazonadas reciba e unha colectiva para os outros catro finalistas.

Para máis información pódese consultar a súa completa páxina web